مراسم دفن جنازه فرخنده در کابل

مراسم جنازۀ فرخنده امروز(یک‌شنبه ۲حمل) با حضور گستردۀ علمای دینی، فعالان مدنی و شهروندان برگزار گردید.

سه روز پیش ده‌هاتن شهروندان خشم‌گین در زیارت شاه دوشمشیره، در کابل فرخنده را به اتهام این‌که قرآن را آتش زده در آغاز با ضربات لگد، چوب، سنگ و پرتاب از ارتفاع‌های چندمتری کشتند و پس از آن جسدش را آتش زدند.                              شماری از افراد به شمول مولوی ایاز نیازی، یک‌تن از علمای دینی افغانستان، سیمین غزل حسن‌زاده، معیین وزارت اطلاعات و فرهنگ و حشمت ستانکزی، سخن‌گوی پولیس کابل در آغاز از این اقدام شهروندان پشتی‌بانی کردند.

اما شهروندان امروز مولوی ایاز نیازی را نگذاشتند تا در مراسم جنازۀ فرخنده اشتراک کند و او را با خشم از محل نماز جنازه بیرون کردند.

برخی از علمای دینی که در مراسم جنازۀ فرخنده اشتراک کرده بودند گفتند که اسلام دین وحشت نیست و افرادی که دست به کشتن فرخنده زدند، باید به جزای عمل‌شان رسانیده شوند.

اشتراک‌کننده‌گان در مراسم جنازۀ فرخنده گفتند که به اعتراض‌های‌شان تا زمانی‌که عاملان قتل او به دادگاه کشانیده شده و مجازات شوند، ادامه خواهند داد.